मेरे बारे में

मेरी फ़ोटो
LOONKARANSAR, RAJASTHAN, India
..कि स्वंय की तलाश जारी है अपने और बैगानों के बीच !!

रविवार, 14 अप्रैल 2013

गुवाळियो


!!?!!!!?!!
गुवाळियो
!!?!!!!?!!

बँसरी बजावंतो
प्रीत गीत गावंतो
गुवाळियो-

पाळतो पेट
बिना लाग लपेट.!

देवंतो जावै
करड़ा-कंवळा समाचार-

इण सींव नै
उण सींव रा.!!
प्रस्तुतकर्ता पर कोई टिप्पणी नहीं:

=-=-=-=-=-=-=-=-=
प्रेम रो नावं कान्हो है
=-=-=-=-=-=-=-=-=

प्रेम वीरां  रो  बानो है
प्रेम परखै तो तानो है

रंगत री बात कै करनी
प्रेम सतरंगी पानो है

प्रेम मीरां है राधा है
प्रेम सबरी सी श्रद्दा है

प्रेम मुरली है होठां री
प्रेम रो नावं कान्हो है
प्रस्तुतकर्ता पर कोई टिप्पणी नहीं:

"+"+"+"+"+"+"
नारी राजस्थान री
"+"+"+"+"+"+"


फोग फोग झाँसी राणी है
बाँठ बाँठ में मीरां है..!

पन्ना धाय है पन्ना बरणी
चूंडावत रानी हीरा  है..!!

करै उजाळो जिण घर जावै
राखै बात जबान री...

काम पड़्यां सिर काट नाखदै
नारी राजस्थान री.!!
प्रस्तुतकर्ता पर कोई टिप्पणी नहीं:

मरुधर म्हारो देस


मरुधर म्हारो देस
:-:-:-:-:-:-:-:-:-:-:-:

सीस ताण गरबीला धोरा
टोकी चढ गिगनार भिङै

लूवां तप बजर सी छाती
वीर रस सूं भरी तिङै

शरणागत री करै रुखाळी
लुळ लुळ गळै लगावै है

आँख दिखायां फुँफखारै-
ज्यूं फण ताणतो नाग छिङै

प्रीत कसौटी खरो उतरतो
निछरावळ हमेस.!

मंगळ गावै मोद मनावै
मरुधर म्हारो देस.!!
प्रस्तुतकर्ता पर कोई टिप्पणी नहीं:

बेटा..कद आवैला गांव


बेटा..कद आवैला गांव
=-=-=-=-=-=-=-=-=

बेटा..कद आवैला गांव

दादो झलग्या
पकङी मांची
दादी  कूकै
जमग्या आंसू
बूढी  काया
फिरै डोलती
आंख  फूटगी
कद करवा’सी

दिन आथण ओ नांव
बेटा..कद आवैला गांव

आंधी कै ही
डाकण ही बा
साथै लै’गी
टेण-छपरिया
खींप कूदग्या
दूजी बाखळ
खूंटा पङग्या
धूङ खावंता

धूं-तावङो, को’नी छांव
बेटा..कद आवैला गांव

नीरो निवङ्यो
भूखा डांगर
रोज डीडावै
ठाण चाटता
काठी सूखी
दूध कठै अब
फिरै रोगला
डगमग ढांडा

साथै - निकळी पांव
बेटा..कद आवैला गांव

रोज बटाऊ
चौकी ढूकै
करां चीकणी
रोटी क्यांऊं
स्यान राखतां
स्यान आयगी
मरज़ादा नित
चौङै आवै

फूट्या एक एक ठांव
बेटा..कद आवैला गांव

कितरी आंख्यां
थळी चीरती
बळै काळजो
आंख्यां रङकै
घोङै सू’दी
दो दो बेट्यां
किंया खटावै
बाबल आंगण

धोरै  चाढ  इण  डांव
बेटा..कद आवैला गांव

करूं हथाई
किण रै साथै
हुयो एकलो
आंगण खावै
जद सूं थांरो
नानो गुजरया
मायङ थांरी
रैवै गुमसुम

काग थक्यो कर कांव
बेटा..कद आवैला गांव

सुख री छिंयां
मंदी पङगी
दुख रो दाळद
दिन दिन दूणो
बाबल थांरो
घणो थाकग्यो
कद हुवैला
मै’र थांरली

खेत चढायो दांव
बेटा..कद आवैला गांव

प्रस्तुतकर्ता पर कोई टिप्पणी नहीं:
सदस्यता लें संदेश (Atom)